интенданттық қызмет

(Интендантская служба)

қарулы күштердегі әскерді азық-түлікпен, жемшөппен, заттай және жүк тасымалдау-шаруашылық мүліктермен жабдықтауды басқаратын, сондай-ақ жеке құрамды пәтермен және тұрмыстық қамтамасыз етуді ұйымдастыратын қызмет. Бір кезеңдерде кейбір армияларда И.қ. медициналық, малдәрігерлік мүліктермен, ақшалай қаражаттармен жабдықтауды басқаратын. И.қ. құрамына, әдетте, басқару органдары мен әр түрлі интенданттық мекемелер (қоймалар, шеберханалар, наубайханалар) кіретін. И.қ. XVII ғасырда Францияда пайда болған. Сол кезде Францияда әкімшілік билікке ие және әскерлерді соғыс кезінде жабдықтауды басқаратын армия интенданттары мен әскери комиссарлар болған. Ресейде интенданттық қызметті І Петр 1700 ж. құрған. 1798 ж. орыс армиясында комиссариаттық және провианттық (азық-түліктік) департаменттер құрылды. Оларды 1801—1808 жылдары генерал-интендант басқарған. 1935 ж. атқаратын міндет-терінің қиындауына байланысты әскери-шаруашылық жабдықтау қызметі — азық-түлікпен және жүк тасымалдау-затпен жабдықтау болып екіге бөлінген. 1940 ж. бас интенданттық басқарма құрылды. Кейбір ірі державалардың (АҚШ, Ұлыбритания) Қарулы Күштерінде интенданттық қызмет міндеттерін квартирмейстрлік, әкімшілік және басқа қызметтер атқарады. Кейбір елдердің армияларында (Австрия, Испания және басқа) интенданттық қызмет қазіргі уақытта да бар.